ஒவ்வொரு ஆண்டும் சமூக நீதிக்கான உலக நாள் (World Day of Social Justice), ஐ.நா.சபை அறிவிப்பின் படி பிப்ரவரி 20 அன்று கடைப்பிடிக்கப்படுகிறது. ஆனால், இந்த நாள் நினைவூட்டுவது வெறும் விழிப்புணர்வை மட்டுமல்ல; சமூக நீதி நடைமுறையில் எவ்வளவு வலுவடைந்துள்ளது என்ற சுயவிமர்சனத்தையும் ஆகும்.
இன்றைய நாளில், நம் தமிழ் சமூகத்தில் சமூகநீதிக் கருத்துக்கள் – வலுப்பெற்றுள்ளதா? அதன் சமகால நிலை என்ன? என்பது குறித்துச் சற்றுப் பார்க்கலாம்.
தமிழ் சமூகத்தில் சமூகநீதிக் கருத்துக்கள் வலியுறுத்திப் போராடியவர்களின் தொடர்ச்சி மிக நீண்டதாக இருந்தபோதிலும், 20ஆம் நூற்றாண்டில் அரசியல் மற்றும் சமூக இயக்கங்களின் மூலம் தெளிவான வடிவம் பெற்றன. குறிப்பாக, பெரியார் என அழைக்கப்படும், ஈ.வெ.ராமசாமி அவர்கள் முன்னெடுத்த சுயமரியாதை இயக்கம் சாதி ஒழிப்பு, பெண்சாதி விடுதலை, மதச்சார்பின்மை போன்ற கருத்துக்கள் பலராலும் கவனம் பெற்றன. பின்னர் அவர் வழியில், திராவிடத் தலைவர்கள் பலரது அரசியல் வழிநடத்தலில் சமூக நீதி, அரசுக் கொள்கையாகவும் மாறியது.
வலுப்பெற்ற பரிமாணங்கள்
1️⃣ கல்வி மற்றும் ஒதுக்கீட்டு கொள்கை
தமிழகத்தில் ஒதுக்கீட்டு முறை (Reservation Policy) சமூக மற்றும் கல்வி ரீதியாக பின்தங்கியவர்களுக்கு உயர்கல்வி மற்றும் அரசு வேலைவாய்ப்பில் வாய்ப்புகளை ஏற்படுத்தியது. இது சமூகநீதியின் நடைமுறை வெற்றியாக கருதப்படுகிறது.
2️⃣ பெண்களின் முன்னேற்றம்
பெண்கள் கல்வி, வேலைவாய்ப்பு, அரசியல் பிரதிநிதித்துவம் ஆகிய துறைகளில் முன்னேற்றம் அடைந்துள்ளனர். உள்ளாட்சி அமைப்புகளில் பெண்களுக்கு வழங்கப்பட்ட ஒதுக்கீடு சமூக மாற்றத்திற்கான ஒரு முக்கிய அடையாளமாகும்.
3️⃣ அரசியல் விழிப்புணர்வு
சமூகநீதி என்பது தமிழ்நாட்டில் வெறும் கோட்பாடு அல்ல; அது தேர்தல் அரசியலின் மையக் கருத்தாகவே உள்ளது. சமூக சமத்துவம் குறித்த உரையாடல் பொதுவெளியில் தொடர்ந்து நடைபெறுகிறது.
தொடரும் சவால்கள் – ஒரு விமர்சன நோக்கு
🔹 சாதி அடிப்படையிலான வேறுபாடு
சட்ட ரீதியான சமத்துவம் இருந்தாலும், சமூக மனப்பான்மையில் சாதி சார்ந்த பாகுபாடு முற்றிலும் நீங்கவில்லை. இடைக்கிடையே நிகழும் சாதி மோதல்கள் இதை வெளிப்படுத்துகின்றன.
🔹 பொருளாதார சமத்துவமின்மை
நகர்ப்புற வளர்ச்சி வேகமாக நடந்தாலும், ஊரகப் பகுதிகளில் வறுமை மற்றும் வேலைவாய்ப்பு குறைபாடு தொடர்கிறது. கல்வி வாய்ப்பு கிடைத்தாலும், தரம் மற்றும் அணுகல் சமமில்லை.
🔹 அரசியல் மற்றும் கொள்கை இடைவெளி
சமூகநீதி அரசியல் கோஷமாக வலுப்பெற்றிருந்தாலும், நடைமுறை அமல்படுத்தலில் சில சமயங்களில் குறைபாடுகள் இருக்கின்றன. சமூகநீதியின் பெயரில் அரசியல் ஆதாயம் தேடப்படுவது குறித்த விமர்சனங்களும் உள்ளன. சமூகநீதிக் கொள்கை பேசும் அரசியற் கட்சிகள் பலவும், தேர்தல் வெற்றிக்காக சாதீயச் சிந்தனைகளால் ஒருங்கமைக்கப்படுவது முக்கியமான ஒரு நகைமுரண்.
🔹 இலங்கைத்தமிழர் நிலை
இலங்கையில் தமிழர்களின் அரசியல் மற்றும் மனித உரிமை சவால்கள் இன்னும் முழுமையாக தீர்க்கப்படவில்லை. போராட்ட காலத்தில் தமிழர் பகுதிகளில் மறைந்திருந்த சாதீயச் சிந்தனைகள், போருக்குப் பிந்தைய காலத்தில் மீளவும் துளிர்விடுவது கண்கூடு. அரசியற் சமரசமும் சமத்துவமான அபிவிருத்தியும் தொடர்ந்து விவாதப் பொருளாகவே உள்ளது.
சமகால மாற்றங்கள்
டிஜிட்டல் காலத்தில் சமூகநீதிக் கருத்துக்கள் புதிய பரிமாணம் பெற்றுள்ளன. சமூக ஊடகங்கள் வழியாக இளைஞர்கள் சமத்துவம், பாலின உரிமைகள், சுற்றுச்சூழல் நீதி போன்ற புதிய கேள்விகளை எழுப்புகின்றனர். இது சமூகநீதியின் பரப்பை விரிவுபடுத்துகிறது. ஆனால், இணையத்தளங்களில் வெறுப்புரைகள் மற்றும் பாகுபாட்டு பேச்சுக்கள் அதிகரிப்பதும் ஒரு புதிய சவாலாக மாறியுள்ளது.
தமிழ் சமூகத்தில் சமூகநீதிக் கருத்துக்கள் வரலாற்று ரீதியாக வலுவாக பதிந்துள்ளன. கல்வி, ஒதுக்கீடு, அரசியல் உரையாடல் போன்ற துறைகளில் முன்னேற்றம் தென்படுகிறது. ஆனால், சமூக மனப்பான்மை மாற்றம், பொருளாதார சமநிலை மற்றும் மனித உறவுகளில் சமத்துவம் ஆகியவை இன்னும் முழுமை பெறவில்லை. அதனால், சமூகநீதி “நடைமுறை வெற்றி பெற்ற கொள்கை” என்றும் “முழுமை அடையாத இலக்கு” என்றும் ஒரே நேரத்தில் கூறப்படலாம்.
சமூகநீதி ஒரு தொடர் பயணம்; அது ஒரு இறுதி நிலை அல்ல...
- 4தமிழ்மீடியாவிற்காக : யாத்ரா
