அதிவேக நெடுஞ்சாலைகளின் மேலாண்மை மற்றும் தினசரி செயல்பாடுகள் தனியாரிடம் ஒப்படைக்கப்பட்டது

இன்று (ஏப்ரல் 01) முதல் அமுலுக்கு வரும் வகையில், முறையான நிர்வாக ஒப்பந்தத்தின் கீழ், நாட்டின் அதிவேக நெடுஞ்சாலைகளின் தினசரி செயல்பாடுகள் மற்றும் மேலாண்மை அதிகாரபூர்வமாக தனியாரிடம் ஒப்படைக்கப்பட்டுள்ளது.

மேலும், சாலை அபிவிருத்தி அதிகாரசபை (RDA) மற்றும் தனியார் துறை இணைந்து மேற்கொண்ட சட்ட மற்றும் நிதி சாத்தியக்கூறு ஆய்வின் பின்னர், தொடர்புடைய அனைத்து சொத்துக்களும் ஆறு மாதங்களுக்குள் தனியாருக்கு மாற்றப்படும் என தெரிவிக்கப்பட்டுள்ளது.

போக்குவரத்து அமைச்சர் பந்துல குணவர்தன இது தொடர்பான அமைச்சரவைப் பத்திரத்தை 2024 மார்ச் 25ஆம் திகதி அமைச்சரவைக்கு சமர்ப்பித்திருந்தார்.

அதன்படி, அதிவேக நெடுஞ்சாலை வலையமைப்பு, அதிவேக நெடுஞ்சாலைக்கு சொந்தமான நிலங்கள் மற்றும் தொடர்புடைய ஊழியர்கள் சம்பந்தப்பட்ட தனியார் துறை நிறுவனத்திற்கு மாற்றப்படுவார்கள், இதனால் அவர்கள் அதிவேக நெடுஞ்சாலை வலையமைப்பை வணிக ரீதியாக நிர்வகிக்க முடியும்.