கொழும்பு மற்றும் அதனை அண்மித்த பகுதிகளில் உள்ள சந்தி மற்றும் சமிக்ஞை விளக்குகளுக்கு அருகில் பிச்சைக்காரர்களுக்கு பணம் வழங்குவதை தவிர்க்குமாறு இலங்கை பொலிஸார் பொதுமக்களிடம் கோரிக்கை விடுத்துள்ளனர்.
கொழும்பை அண்மித்த பகுதிகளில் உள்ள சந்தி மற்றும் சிக்னல் விளக்குகளில் பிச்சை எடுப்பவர்களை அகற்ற நடவடிக்கை எடுக்கப்பட்டு வருவதாகவும், இதற்காக சீருடை மற்றும் சிவில் உடையில் பொலிஸ் உத்தியோகத்தர்கள் போக்குவரத்து விளக்குகளுக்கு அருகில் நிறுத்தப்பட்டுள்ளதாகவும் அவர் மேலும் தெரிவித்தார்.
முக்கிய பகுதிகளில் பிச்சை எடுப்பவர்களை ஒழிக்கும் நடவடிக்கையின் ஒரு பகுதியே இவை என்று கூறிய அவர், வாகன சாரதிகளும் பயணிகளும் பணம் கொடுப்பதைத் தவிர்த்தால் பிச்சைக்காரர்களை ஒழிக்க முடியும் என்று சுட்டிக்காட்டினார்.
சிங்களம், தமிழ் மற்றும் ஆங்கிலம் ஆகிய மூன்று மொழிகளிலும் வீடியோ செய்திகள் மூலம் புதிய நடவடிக்கைகள் குறித்து சாரதிகளுக்கு அறிவிக்க நடவடிக்கை எடுக்கப்பட்டுள்ளதாக பிரதி பொலிஸ் மா அதிபர் இந்திக்க ஹப்புகொட அறிவித்துள்ளார்.
நாள் ஒன்றுக்கு ரூ.2500 முதல் 3000 வரை ஊதியம் பெறும் வேலை வாய்ப்பு அளிக்கப்பட்டபோது, பிச்சை எடுப்பவர்கள், பிச்சை எடுத்து நாள் ஒன்றுக்கு ரூ.15,000 முதல் ரூ.20,000 வரை சம்பாதிப்பதாகக் கூறி அந்த வாய்ப்பை நிராகரித்துவிட்டனர்.
கடந்த வாரத்தில் 94 பிச்சைக்காரர்கள் கைது செய்யப்பட்டு நீதிமன்றத்தில் ஆஜர்படுத்தப்பட்டதாகவும், ஆனால் அவர்கள் நீண்ட நாட்களுக்கு விளக்கமறியலில் வைக்க முடியாததால் அபராதம் விதிக்கப்பட்ட பின்னர் விடுவிக்கப்பட்டதாகவும் பிரதி பொலிஸ் மா அதிபர் ஹப்புகொட மேலும் தெரிவித்தார்.
பெரும்பாலான பிச்சைக்காரர்கள் போதைப்பொருள் பாவனைக்கு கடுமையாக அடிமையாகியுள்ள நிலையில், பிச்சை எடுப்பதில் முழுநேர தொழிலாக சிலர் ஈடுபடுவதாகவும், அவ்வாறான நபர்களுக்கு புனர்வாழ்வளிக்க நடவடிக்கை எடுக்கப்பட்டுள்ளதாகவும் அவர் சுட்டிக்காட்டினார்.
