இயற்கை அவ்வப்போது மனிதகுலத்திற்கு எச்சரிக்கை மணியை ஒலித்துக் கொண்டே இருக்கிறது. அந்த எச்சரிக்கைகளை நாம் புறக்கணிக்கும்போது, அவை பேரிடர்களாக நம்மை வந்தடைகின்றன. இன்று உலகம் எதிர்கொண்டு வரும் காட்டுத்தீ பேரழிவுகள் அத்தகைய எச்சரிக்கைகளில் மிகவும் ஆபத்தான ஒன்றாகும்.
கனடாவின் பரந்த வனப்பகுதிகள் முதல் ஆஸ்திரேலியாவின் உயிர்ப்பன்மை மிகுந்த காடுகள் வரை, ஐரோப்பிய நாடுகளின் மலைக் காடுகள் முதல் தென் அமெரிக்காவின் மழைக்காடுகள் வரை, காட்டுத்தீ உலகின் காலநிலை அமைப்பையே அச்சுறுத்தும் ஒரு பெரும் சுற்றுச்சூழல் நெருக்கடியாக உருவெடுத்துள்ளது.
காட்டுத்தீ என்பது ஒரு குறிப்பிட்ட நாட்டின் பிரச்சினையோ அல்லது ஒரு பருவகால இயற்கை நிகழ்வோ அல்ல. அது உலகளாவிய காலநிலை மாற்றத்தின் காரணமாக உருவாகும் ஒரு பேராபத்தான தொடர் விளைவாகும். இன்னும் கவலைக்கிடமான உண்மை என்னவென்றால், காட்டுத்தீ காலநிலை மாற்றத்திற்குக் காரணமாகவும், காலநிலை மாற்றத்தின் விளைவாகவும் மாறியிருப்பதுதான். இதுவே எதிர்கால உலகின் காலநிலை பாதுகாப்பிற்கு மிகப்பெரிய சவாலாக உள்ளது.
காடுகள் பூமியின் நுரையீரல்கள் என்று அழைக்கப்படுகின்றன. அவை வளிமண்டலத்தில் உள்ள கரியமில வாயுவை உறிஞ்சி, வெப்பநிலையைச் சமநிலைப்படுத்தி, மழைப்பொழிவு சுழற்சியைப் பாதுகாக்கின்றன. ஆனால், ஒரு காட்டுத்தீ நிகழும்போது, பல நூற்றாண்டுகளாக இயற்கை சேமித்து வைத்திருந்த கார்பன் சில மணிநேரங்களில் வளிமண்டலத்தில் வெளியேற்றப்படுகிறது. இதன் மூலம் உலக வெப்பமயமாதல் மேலும் தீவிரமடைகிறது.
இன்று நாம் எதிர்கொள்ளும் காட்டுத்தீ சம்பவங்கள், நாளைய உலகின் காலநிலை வரைபடத்தை மாற்றும் சக்தி கொண்டவை. வெப்பநிலை அதிகரிப்பு, பருவமழை மாற்றம், நீர்வளப் பற்றாக்குறை, கடல் மட்ட உயர்வு போன்ற பல்வேறு சுற்றுச்சூழல் பிரச்சினைகளுக்கு இவை மறைமுகமாக வழிவகுக்கின்றன.
காட்டுத்தீயின் மிகக் கவலைக்குரிய விளைவு உலக வெப்பநிலையின் உயர்வாகும். காடுகள் அழிவதால் வளிமண்டலத்தில் பசுமைக் குடில் வாயுக்கள் அதிகரிக்கின்றன. இதன் விளைவாக வெப்ப அலைகள் நீடிப்பதும், கோடைக்கால வெப்பநிலை புதிய உச்சங்களை எட்டுவதும், பல பகுதிகளில் மனிதர்கள் வாழ்வதற்கே சவாலான சூழல் உருவாவதும் தவிர்க்க முடியாததாகிவிடுகிறது.
ஆஸ்திரேலியாவில் 2019–2020 ஆம் ஆண்டுகளில் ஏற்பட்ட "Black Summer" காட்டுத்தீ உலகிற்கு ஒரு மிகப்பெரிய பாடத்தை கற்றுக் கொடுத்தது. மில்லியன் கணக்கான ஹெக்டேர் வனப்பகுதிகள் எரிந்து சாம்பலானதோடு, பெருமளவிலான கரியமில வாயுக்கள் வளிமண்டலத்தில் கலந்தன. ஆயிரக்கணக்கான உயிரினங்கள் அழிந்தன. இயற்கையின் சமநிலையை ஒரு காட்டுத்தீ எவ்வளவு ஆழமாகக் குலைக்க முடியும் என்பதற்கு இது ஒரு சோகமான எடுத்துக்காட்டாகும்.
அதேபோல், மழைப்பொழிவு சுழற்சியிலும் காட்டுத்தீ தீவிரமான மாற்றங்களை ஏற்படுத்துகிறது. காடுகள் உருவாக்கும் ஈரப்பதம் குறைவதால் வறட்சி நிலைமைகள் அதிகரிக்கின்றன. சில பகுதிகளில் கடுமையான வறட்சியும், சில பகுதிகளில் எதிர்பாராத கனமழையும் வெள்ளப்பெருக்கும் ஏற்படுகின்றன. இதன் தாக்கம் விவசாய உற்பத்தி முதல் குடிநீர் வளங்கள் வரை பல துறைகளில் எதிரொலிக்கிறது.
காட்டுத்தீயின் விளைவுகள் பூமியின் பனிப்பாறைகளையும் விட்டுவைக்கவில்லை. காட்டுத்தீயினால் உருவாகும் கரித்துகள்கள் பனிப்பாறைகளின் மீது படிந்து அவற்றின் பிரதிபலிப்புத் தன்மையைக் குறைக்கின்றன. இதனால் அவை அதிக வெப்பத்தை உறிஞ்சி வேகமாக உருகுகின்றன. அதன் விளைவாக கடல் மட்டம் உயர்ந்து, உலகின் கடலோரப் பகுதிகள் பெரும் அச்சுறுத்தலை எதிர்கொள்கின்றன.
இங்கு நாம் புரிந்துகொள்ள வேண்டிய மிக முக்கியமான உண்மை ஒன்று உள்ளது. காலநிலை மாற்றம் காட்டுத்தீயை உருவாக்குகிறது; காட்டுத்தீ மீண்டும் காலநிலை மாற்றத்தை மேலும் தீவிரப்படுத்துகிறது. இந்த தீய சுழற்சியை உடைக்கத் தவறினால், எதிர்காலத்தில் காட்டுத்தீ என்பது ஒரு இயற்கைப் பேரிடர் என்ற எல்லையைத் தாண்டி, மனித வாழ்வையே பாதிக்கும் காலநிலைப் பேரிடராக மாறிவிடும்.
இந்தச் சூழலில், தமிழகத்திற்கும் இந்தியாவிற்கும் இந்தப் பிரச்சினை தொலைதூர நாடுகளின் செய்தியாக மட்டும் கருதப்பட முடியாது. மேற்குத் தொடர்ச்சி மலைகள், நீர்ப்பிடிப்பு வனப்பகுதிகள் மற்றும் உயிர்ப்பன்மை மிக்க சூழலியல் அமைப்புகள் பாதிக்கப்படும் பட்சத்தில், அதன் தாக்கம் பருவமழை, குடிநீர் வளம் மற்றும் விவசாய உற்பத்தி ஆகியவற்றின் மீது நேரடியாகப் பிரதிபலிக்கும். இன்று வனங்களைப் பாதுகாப்பது என்பது நாளைய நீராதாரங்களைப் பாதுகாப்பதற்கு இணையானதாகிவிட்டது.
எனவே, காட்டுத்தீயை எதிர்கொள்வதற்கான முயற்சிகள் வெறும் தீயணைப்பு நடவடிக்கைகளில் மட்டும் முடிவடையக் கூடாது. செயற்கைக்கோள் வழிக் கண்காணிப்பு, முன்கூட்டிய எச்சரிக்கை அமைப்புகள், வனப் பாதுகாப்புக் கொள்கைகள், சுற்றுச்சூழல் கல்வி மற்றும் உலகளாவிய பசுமைக் குடில் வாயுக் குறைப்பு நடவடிக்கைகள் ஆகியவை ஒருங்கிணைந்த முறையில் செயல்படுத்தப்பட வேண்டும். சுற்றுச்சூழல் பாதுகாப்பை வளர்ச்சிக்குத் தடையாகக் கருதும் பழைய சிந்தனையிலிருந்து உலக நாடுகள் வெளியே வர வேண்டிய கட்டாயமும் ஏற்பட்டுள்ளது.
காட்டுத்தீ சம்பவங்கள் நமக்கு ஒரு தெளிவான செய்தியைச் சொல்கின்றன: இயற்கையின் சமநிலையை நாம் குலைத்தால், இயற்கை அதன் விலையை நம்மிடமிருந்து வசூலிக்கும். இன்று எரிவது காடுகள் மட்டுமல்ல; நாளைய தலைமுறையினரின் காலநிலைப் பாதுகாப்பும், குடிநீர் வளங்களும், உணவுப் பாதுகாப்பும், மனித நாகரிகத்தின் நிலைத்தன்மையும் கூட.
இயற்கையைப் பாதுகாப்பது என்பது சுற்றுச்சூழல் ஆர்வலர்களின் பொறுப்பு மட்டுமல்ல. அது மனிதகுலத்தின் கூட்டு பொறுப்பு. காட்டுத்தீயின் புகை வானத்தை மட்டுமல்ல, மனிதனின் எதிர்காலத்தையும் மூடிக்கொண்டிருக்கிறது என்பதை நாம் இப்போதாவது உணர வேண்டிய நேரம் இது.
- 4தமிழ்மீடியாவிற்காக : மலைநாடான்
