‘கபாலி’ படத்தின் முதல் பார்வை போஸ்டரை தனியார் விமானங்களின் உடல் முழுவதும் ஒட்டி விளம்பரம் செய்தவர் தயாரிப்பாளர் கலைப்புலி எஸ்.தாணு. எதைச் செய்தாலும் பிரம்மாண்டமாகச் செய்ய நினைக்கும் இவர் நன்கொடை கொடுப்பதிலும் தன்னுடைய பிரம்மாண்டத்தைக் காட்டியிருக்கிறார்.
கடந்த 2020-ஆம் ஆண்டு இயக்குநர் வெற்றிமாறன் ஏழை மற்றும் விளம்பு நிலைச் சமூகங்களிலிருந்து திரைப்படத்துறைக்கு வரும் மாணவர்களுக்கு பயிற்சி அளிப்பதற்காக ‘நாம் அறக்கட்டளை’ என்ற ஒன்றைத் துவக்கினார். அதன் சார்பாக ‘திரை - பண்பாடு ஆய்வக’த்தையும் (Screen Culture Lab) அவர் துவக்கியுள்ளார் .
இதன் மூலம், சமூகத்தில் ஒடுக்கப்பட்ட , பிற்படுத்தப்பட்ட , பொருளாதாரத்தில் பின் தங்கிய மாணவ , மாணவிகளுக்கு நுழைவு தேர்வு வைத்து அவர்களின்
வீடுகளுக்கு நேரடியாக சென்று , உண்மையிலேயே சமூகத்தால் புறக்கணிக்கப்பட்டு , ஒடுக்கப்பட்டு , பொருளாதாரத்தில் பின் தங்கிய நிலையில் விளிம்புநிலை மனிதர்களாக , முதல் தலைமுறை பட்டாதாரிகளாக இருக்கிறார்களா ? தனது வலியை, தனது பண்பாட்டை ஊடகங்களில் பதிவு செய்ய வேண்டும் என்ற ஆர்வத்தில் இருக்கிறார்களா என்று ஆய்வு செய்து அவர்கள் குடும்பத்தின் ஒப்புதலோடு மாணவ , மாணவிகளுக்கு கல்வி , உணவு , தங்குமிடம் போன்ற வசதிகளை கட்டணமில்லாமல் ஏற்பாடு செய்து ஊடகத்துறையில் மிகச் சிறந்த ஆளுமைகளாக உருவாக்க இந்நிறுவனத்தை அவர் உருவாக்கி இருப்பதாக நம்மிடம் தெரிவித்தார் .
இந்நிறுவனத்தின் துவக்க நிகழ்ச்சியின் போது கலைப்புலி எஸ். தாணு முதல் நபராக ஒரு கோடி ரூபாய் வெற்றிமாறனின் தாயார் மேகலா சித்திரவேலிடம் கொடுத்து , இந்நிறுவனத்தில் படிக்கும் மாணவர் மாணவிகளுக்கு வெற்றிமாறன் யாரை கை காட்டுகிறாரோ அவர்களுக்கு தனது தன்னுடைய வி கிரியேஷன் பட நிறுவனத்தில் முதல் திரைப்படத்தை இயக்கும் வாய்ப்பு தரப்படும்" என்றும் அறிவித்தார்.
‘நாம் அறக்கட்டளை’யை சார்ந்த பொறுப்பாளர்கள் ஆர்த்தி வெற்றிமாறன் , வெற்றி துரைசாமி மற்றும் பாட திட்டத்தை வடிவமைத்த சென்னை, லயோலா கல்லூரியின் முன்னாள் ஊடகத்துறைப் பேராசிரியர் பாதிரியார் ராஜா நாயகம் உடன் இருந்தார். தற்போது முதல் தொகுதி மாணவர்கள் தேர்ந்தெடுக்கப்பட்டு, அவர்கள் பயிற்சி அளிக்கப்பட்டு வருகிறார்கள்.
-4தமிழ் மீடியாவுக்காக: மாதுமை
