நவராத்திரியில், இரண்டாம் அடுக்காக வரும் மூன்று இராத்திரிகள் சக்தியை இலட்சமீகரம் தரும் அன்னையாக வழிபடுவது மரபு. இலக்சுமீகரம் நம் வாழ்வில் நிறைவதற்கான வழிபாடுகளாக அடுத்து வரும் நாட்கள் அமைகின்றன.
நான்காம் நாள் - கருணை
சக்தி: பிறருடைய வலியை உணரும் இதயம்
ஆன்மீகத்தின் உயரத்தை அளப்பதற்கு, ஒருவர் எத்தனை முறை வழிபடுகிறார் என்பதைக் காட்டிலும், பிறருடைய துயரத்தை எவ்வளவு உணர்கிறார் என்பதும் முக்கியமான அளவுகோலாக அமையலாம்.
பசியுடன் இருப்பவரைப் பார்த்தும் பார்க்காதது போலக் கடந்து செல்வது எளிது. தனிமையில் வாடுபவரின் அருகில் அமர்ந்து சில நிமிடங்கள் பேசுவது அதைவிடக் கடினமாக இருக்கலாம். மனம் உடைந்த ஒருவருக்குச் சரியான ஆறுதல் அளிப்பதும் பொறுமையையும் பரிவையும் வேண்டுகிறது.
கருணை என்பது பரிதாபத்துடன் பிறரைப் பார்ப்பது மட்டுமல்ல. அவர்களுடைய துயரத்தைப் புரிந்துகொண்டு, நம்மால் இயன்ற உதவியைச் செய்வதாகும்.
அது பணமாக மட்டுமே இருக்க வேண்டியதில்லை. ஒருவருடைய பேச்சைக் குறுக்கிடாமல் கேட்பது, வயதானவருக்கு வழிகாட்டுவது, மாற்றுத்திறனாளிக்கு உதவுவது, தனிமையில் இருக்கும் ஒருவரை அன்புடன் விசாரிப்பது எனப் பல சிறிய செயல்களில் கருணை வெளிப்படுகிறது.
அன்னைக்கு நாம் படைக்கும் மலர்களுக்கு மணம் இருக்கிறது. ஆனால் மனிதர்களிடம் நாம் பகிரும் அன்புக்கு, அவர்களுடைய வாழ்க்கையையே மாற்றக்கூடிய ஆற்றல் இருக்கிறது.
நான்காம் நாளில் நாம் அறிந்து கொள்ளும் வாழ்க்கைப் பாடம்: யாரேனும் ஒருவருடைய நாளைச் சிறிதளவாவது மகிழ்ச்சியாக்கும் செயலைச் செய்வோம். கருணை என்பது உள்ளத்தில் தோன்றும் உணர்வு மட்டுமல்ல; பிறருடைய வாழ்க்கையில் நன்மையாக மலரும் செயல்.
ஐந்தாம் நாள் - ஒழுக்கம்
சக்தி: நம்மை நாமே வழிநடத்துதல்
ஆன்மீக வாழ்க்கையில் விரதம், வழிபாடு, தியானம், மந்திர உச்சரிப்பு போன்றவற்றுக்கு முக்கியத்துவம் அளிக்கப்படுகிறது. இவற்றின் நோக்கம் வெளிப்புறச் சடங்குகளை நிறைவேற்றுவது மட்டுமல்ல; மனத்தையும் நடத்தையையும் ஒழுங்குபடுத்துவதற்கான பயிற்சியாகவும் அவற்றை அணுகலாம்.
ஒழுக்கம் என்பது கடுமையான கட்டுப்பாடுகளுக்குள் நம்மை அடைத்துக்கொள்வது அல்ல. நமக்கு நன்மை தருவது எது என்பதை உணர்ந்து, அதற்கேற்ப வாழக் கற்றுக்கொள்வதாகும்.
நேரத்தை மதிப்பது ஒழுக்கம். சொன்ன சொல்லைக் காப்பது ஒழுக்கம். உடல்நலனுக்குத் தேவையான கவனத்தை அளிப்பது ஒழுக்கம். கோபம் வந்தாலும் பிறரைப் புண்படுத்தும் சொற்களைத் தவிர்ப்பதும் ஒழுக்கமே.
நவராத்திரியில் உணவைக் கட்டுப்படுத்தும் விரதத்தை மேற்கொள்பவர்கள், தங்களுடைய மரபுக்கும் உடல்நிலைக்கும் ஏற்ற முறையில் அதை அனுஷ்டிக்கலாம். அதேவேளை, தேவையற்ற பேச்சு, பொறாமை, கோபம், பிறரைப் பழித்தல் போன்றவற்றையும் கட்டுப்படுத்த முயல்வது இந்தக் காலத்தின் ஆன்மீகப் பயனை ஆழப்படுத்தும்.
விரதம் முடிந்ததும் மீண்டும் பழைய பழக்கங்களுக்குத் திரும்பிவிட்டால், அந்த அனுபவம் நமக்குள் என்ன மாற்றத்தை ஏற்படுத்தியது என்ற கேள்வி எழுகிறது.
ஐந்தாம் நாளில்; ஒரு நல்ல பழக்கத்தைத் தேர்ந்தெடுத்து, அதைத் தொடர்ந்து கடைப்பிடிக்க உறுதி கொள்வோம். நம்மை நாமே வழிநடத்தத் தெரிந்தால், வாழ்க்கையின் பல சவால்களைச் சிறப்பாக எதிர்கொள்ள முடியும்.
ஆறாம் நாள் - நன்றி உணர்வு
சக்தி: கிடைத்தவற்றின் மதிப்பை உணர்தல்
மனித மனதிற்கு இல்லாதவற்றை எண்ணும் இயல்பு அதிகம். இன்னும் பெரிய வீடு வேண்டும்; இன்னும் உயர்ந்த பதவி வேண்டும்; இன்னும் அதிகமான செல்வம் வேண்டும்; பிறரிடம் இருப்பதைப் போல நமக்கும் வேண்டும்.
வளர்ச்சி வேண்டும் என்று விரும்புவதில் தவறில்லை. ஆனால், நாம் அடைய வேண்டியவற்றைப் பற்றிய கவலையில், ஏற்கெனவே நம்மிடம் இருப்பவற்றின் அருமையை மறந்துவிடக் கூடாது.
நமக்கு உணவளிக்கும் விவசாயி, நம்மைக் காக்கும் இயற்கை, நமக்குக் கல்வி கற்பித்த ஆசிரியர், நம்முடைய நலனுக்காக உழைத்த பெற்றோர், துன்ப நேரத்தில் துணைநின்ற நண்பர் — இவர்களின் பங்களிப்புகள் நமது வாழ்க்கையில் எவ்வளவு ஆழமாகப் பதிந்திருக்கின்றன!
பல நேரங்களில், அவர்களுடைய அன்பை இயல்பான ஒன்றாக எடுத்துக்கொள்கிறோம். நன்றி சொல்ல வேண்டிய தருணத்தைத் தள்ளிப்போடுகிறோம். நம்முடன் இருப்பவர்களின் மதிப்பை, அவர்கள் இல்லாதபோதுதான் உணர்கிறோம்.
நன்றி உணர்வு என்பது முன்னேற்றத்தை மறுப்பதல்ல. நமக்குக் கிடைத்தவற்றின் அருமையை உணர்ந்தபடியே, மேலும் உயர்வதற்கான முயற்சியில் ஈடுபடுவதாகும்.
ஆறாம் நாளில் நாம் அறிந்து கொள்ளும் வாழ்க்கையில் நன்மை செய்த ஒருவரை நினைவுகூர்ந்து, அவருக்கு நன்றியைத் தெரிவிப்போம்.
நன்றி சொல்லும் மனம் வளரும்போது, குறைகளால் நிரம்பிய உலகத்தில்கூட நிறைவைக் காணக் கற்றுக்கொள்கிறோம். அதுவே மனம் நிறைந்த செல்வமாக, இலக்சுமீகரம் தருகிறது.
- 4தமிழ்மீடியயாவிற்காக: மாதுமை