யாழ்.மாவட்ட சுயேட்சை பாராளுமன்ற உறுப்பினர் டொக்டர் இராமநாதன் அர்ச்சுனா தனது பாராளுமன்ற சிறப்புரிமைகளை மீறியதாகக் கூறி இனி ஆளும் கட்சிக்கு ஆதரவளிக்கப் போவதில்லை என இன்று (23) பாராளுமன்றத்தில் அறிவித்தார்.
தமக்கு பாராளுமன்றத்தில் பேசுவதற்கு சந்தர்ப்பம் வழங்கப்படுவதற்கு 36 நாட்கள் தேவைப்பட்டதாக டாக்டர் அர்ச்சுனா தனது விரக்தியை வெளிப்படுத்தினார். அரசாங்கம் இந்தப் பிரச்சினைக்கு நியாயமான முறையில் தீர்வு காணும் என நம்புவதாகவும் ஆனால் எந்த நடவடிக்கையும் எடுக்கப்படவில்லை என்றும் அவர் மேலும் குறிப்பிட்டார்.
இதற்கு பதிலளித்த சபைத் தலைவர் அமைச்சர் பிமல் ரத்நாயக்க, எதிர்க்கட்சி எம்.பி.க்கள் பேசுவதற்கு நேரத்தை ஒதுக்குவது அரசாங்கத்தின் பொறுப்பு அல்ல - எதிர்க்கட்சியின் பொறுப்பு என்று தெளிவுபடுத்தினார். இந்த விடயம் தொடர்பில் சபாநாயகருக்கு பல தடவைகள் அறிவித்துள்ளதாகவும், பாராளுமன்ற உறுப்பினர்களின் பேச்சுரிமையை பாதுகாப்பதற்கு அரசாங்கம் அர்ப்பணிப்புடன் இருப்பதாகவும் அமைச்சர் ரத்நாயக்க மேலும் தெரிவித்தார்.
இந்தக் கருத்துக்களுக்கு பதிலளித்த எதிர்க்கட்சி பாராளுமன்ற உறுப்பினர் கயந்த கருணாதிலக்க, பாராளுமன்றத்தில் அனைத்து உறுப்பினர்களும் பேசுவதற்கு நியாயமான நேரத்தை வழங்குவதற்கு எதிர்க்கட்சி ஏற்கனவே நடவடிக்கை எடுத்துள்ளதாக தெரிவித்தார்.
எதிர்க்கட்சி எம்.பி.க்களுடன் கலந்தாலோசித்து ஏற்பாடுகள் செய்யப்பட்டுள்ளதாகவும், டாக்டர் அர்ச்சுனா முன்மொழியப்பட்ட அட்டவணைக்கு இணங்கினால், அதற்கேற்ப அவருக்கு இடமளிக்க முடியும் என்றும் அவர் வலியுறுத்தினார்.
எவ்வாறாயினும், மேலும் கருத்து தெரிவித்த பாராளுமன்ற உறுப்பினர் அர்ச்சுனா, “நான் இம்முறை சாதாரண பாராளுமன்ற உறுப்பினராக தெரிவு செய்யப்பட்டேன். அதற்கு முன், நான் மருத்துவராக இருந்தேன். இதற்கு முன் ஊடகங்களில் எனது நடத்தை குறித்து ஏதேனும் புகார்கள் வந்துள்ளதா? அரசியலுக்கு வருவதற்கு முன் என் மீது ஒரு வழக்குயாவது போடப்பட்டுள்ளதா? எனக்கு ஏன் நேரம் கொடுக்கப்படவில்லை? ஏன் என்னை மீண்டும் மீண்டும் ‘புலி’ என்று அழுத்துகிறீர்கள் ? நான் ‘புலி’ என்றால் என்னை கைது செய்யுங்கள். அல்லது என்னை சுடவும்...”
"அவர்கள் என்னைக் கொன்றால், அரசாங்கம் பொறுப்பேற்க வேண்டும்," என்று அவர் அறிவித்தார்.
