2026ம் ஆண்டுக்குரிய அமைதிக்கான நோபல் பரிசு, துணிச்சல் மற்றும் நேர்மையுடன், விரிவான உலகளாவிய சட்ட ஒழுங்கை நோக்கி வழிநடத்தியவருமான, நவநீதம்பிள்ளை அவர்களுக்குவழங்கப்படுவதாக அறிவிக்கப்பட்டிருக்கிறது.
இது தொடர்பாக நோபல் பரிசு அமைப்பு வெளியிட்டுள்ள செய்திக் குறிப்பில், போர்க்குற்றங்கள், மனிதகுலத்திற்கு எதிரான குற்றங்கள் மற்றும் இனப்படுகொலைகள் மீது வழக்குத் தொடரப்படுவதை உறுதி செய்வதில் முக்கியப் பங்காற்றியவரும், உலகளாவிய சட்டக் கோட்பாடுகள் மீதான நவநீதம்பிள்ளையின் அர்ப்பணிப்பும், அவரது உறுதியான தார்மீக வழிகாட்டுதலும், அவரது நீண்ட தொழில் வாழ்க்கையில் மாறாத அம்சங்களாகும்.
தென்னாப்பிரிக்காவின் டர்பனில் இன ஒதுக்கல் கொள்கையின் கீழ் இந்தியத் தமிழ் வம்சாவளியைச் சேர்ந்த குடும்பத்தில் பிறந்த நவநீதம் பிள்ளை, ஆழமான கட்டமைப்பு ரீதியான பாகுபாடு, பிரிவினை மற்றும் புறக்கணிப்பை எதிர்கொண்டு ஒரு வழக்கறிஞராகவும் சட்ட முன்னோடியாகவும் ஆனார். இன ஒதுக்கல் கொள்கைக்கு எதிராக நின்ற நெல்சன் மண்டேலா மற்றும் பிறரைப் பாதுகாத்த அவரது ஆரம்பகாலப் பணியிலிருந்து, நமது காலத்தின் சில முக்கிய சர்வதேச நீதிமன்ற வழக்குகளில் நீதிபதியாக அவர் ஆற்றிய சேவை வரை ஒரு பொதுவான சிறப்பு உள்ளதாகத் தெரிவிக்கப்பட்டிருக்கிறது.
இந்த ஆண்டு நோபல் பரிசு பெற்றவர் சர்வதேச சட்டத்தின் நோக்கத்தையும் தாக்கத்தையும் கணிசமாக விரிவுபடுத்தியுள்ளார். அவர் தென்னாப்பிரிக்காவின் உயர் நீதிமன்றம், ருவாண்டாவுக்கான சர்வதேச குற்றவியல் தீர்ப்பாயம் மற்றும் சர்வதேச குற்றவியல் நீதிமன்றம் ஆகியவற்றில் நீதிபதியாகப் பணியாற்றியுள்ளார். அவர் ஐக்கிய நாடுகள் சபையின் மனித உரிமைகளுக்கான உயர் ஆணையராக இருந்தார்.
மேலும், சமீப காலம் வரை, ஆக்கிரமிக்கப்பட்ட பாலஸ்தீனப் பிரதேசம் குறித்த ஐ.நா.வின் சுதந்திரமான சர்வதேச விசாரணை ஆணையத்திற்குத் தலைமை தாங்கினார். இன்று, மியான்மர் இனப்படுகொலைக் குற்றச்சாட்டுக்கு உள்ளான வழக்கில், அவர் சர்வதேச நீதிமன்றத்தில் ஒரு நீதிபதியாக உள்ளார். இலங்கையில் போர்க்குற்ற விசாரணை வேண்டும் என அறிவித்தவர் நவநீதம்பிள்ளை என்பதும் குறிப்பிடத்தக்கது .