இலங்கைத் தலைநகர் கொழும்பு, காலி முகத்திடலில் தொடர்ந்து 5வது நாளாகவும், ஆர்ப்பாட்டத்தில் ஈடுபட்டுள்ள இளைஞர்களுடன் பேச்சுவார்த்தை நடத்த அரசாங்கம் அழைப்பு விடுத்துள்ளது.
அவர்களை கலந்துரையாடலுக்கு அழைப்பதாகவும், பேச்சுவாரத்தை நடத்தத் தயாராக உள்ளதாகவும், பிரதமர் மஹிந்த ராஜபக்ஷ தெரிவித்திருப்பதாக அறியவருகிறது.
நாடளாவிய ரீதியில் இருந்து வந்துள்ள இளைஞர்களால் ஜனாதிபதி செயலகத்திற்கு முன்னால் கடந்த 9ம் திகதி முன்னெடுக்கப்பட்ட இந்த போராட்டம் இரவு பகலாக இடம்பெற்று வருகின்றது.
நாட்டின் பொருளாதார நெருக்கடிக்கு உடனடியாக தீர்வு கோரியும், ஜனாதிபதி உள்ளிட்ட அரசாங்கத்தை பதவி விலகுமாறு வலியுறுத்தியும் நடைபெறும் இந்த ஆர்ப்பாட்டத்தில் ஈடுபட்டுள்ள இளைஞர்களுடன் கலந்துரையாட அரசாங்கம் தயாராக உள்ளதாக பிரதமர் மஹிந்த ராஜபக்ஷ அறிவித்துள்ளமை குறிப்பிடத்தக்கது.
