இலங்கையில் பெரும் இயற்கை அனர்த்தங்களை ஏற்படுத்தி வரும் "டிட்வா" சூறாவளி புயல் இன்று இலங்கைநேரம் அதிகாலை 2.00 மணிக்கு திருகோணமலைக்கு வடமேற்கே சுமார் 60 கி.மீ தொலைவில், அட்சரேகை 8.8°வடக்கு மற்றும் தீர்க்கரேகை 80.8°கி அருகில் மையம் கொண்டுள்ளதாக வானிலை ஆய்வுமையம் வெளியிட்ட தகவலில் தெரிவிக்கப்பட்டுள்ளது.
இந்தப் புயல் மையம் மெதுவாக வடக்கு மற்றும் வடமேற்கு கோக்கி மெதுவாக நகர்ந்து வருவதாகவும், அடுத்து வரும் சில மணி நேரங்களில், இலங்கையின் வடக்கு, வடமத்திய, மற்றும் வடமேற்கு மாகாணங்களுக்குச் சமீபமாகக் நகர்ந்து செல்லலாம் எனவும், இதனால் வடக்கு மற்றும் திருகோணமலை மாவட்டத்தில், இடியுடன் கூடிய தொடர் மழை பெய்யும் எனவும், சில இடங்களில் 200 மி.மீட்டருக்கும் அதிகமான பலத்த மழை பெய்யலாம் எனவும், வானிலை ஆய்வு மையத் தகவல்கள் தெரிவிக்கின்றன.
இதேவேளை இலங்கையின் மத்திய, சப்ரகமுவ மற்றும் மேற்கு மாகாணங்களிலும், 150 மி.மீட்டருக்கும் அதிகமான பலத்த மழை பெய்யும்எனவும், புயல் நகர்ந்து செல்லும் வேகத்திற்கேற்ப, தீவின் பெரும்பாலான பகுதிகளில் மணிக்கு 60 கி.மீ முதல் 90 கி.மீ வேகத்தில் பலத்த காற்று வீசும் என்று எதிர்பார்க்கப்படுகிறது.
பலத்த மழை மற்றும் பலத்த காற்றினால் ஏற்படும் சேதங்களைக் குறைக்க பொது மக்கள் போதுமான முன்னெச்சரிக்கையுடன் நடவடிக்கைகளை எடுக்குமாறு பொதுமக்கள் கேட்டுக் கொள்ளப்பட்டுள்ளனர்.நாட்டில் ஏற்பட்டுள்ள சீரற்ற வானிலை காரணமாகக் கண்டி மற்றும் பதுளை மாவட்டங்களில் இதுவரை 85 உயிரிழப்புக்கள் ஏற்பட்டுள்ளதாகவும், பல பகுதிகளில் இன்றும் மண்சரிவுகள் ஏற்பட்டுள்ளதாகவும், பிரதான போக்குவரத்துப்பாதைகள் துண்டிக்கப்பட்டுள்ளதாகவும், தெரியவருகிறது.
மாத்தளைப் பிரதேசத்தில், 540.6 மில்லிமீட்டரும், கண்டி பகுதிகளில் 400 மில்லிமீட்டருக்கும் அதிகமாகவும் பலத்த மழை பெய்துள்ளது. தொடர்ச்சியான மழை காரணமாக மத்திய மற்றும் மேற்கு மாகாணங்களில் பாயும், மகாவலி, களனி, களுகங்கை, மாணிக்க கங்கை தெதுரு ஓயா, மகா ஓயா, கலா ஓயா மற்றும் மல்வத்து ஓயா ஆகிய நதிகள் பெருக்கெடுத்துப் பாய்வதனால், அவற்றினை அண்மித்த பல பகுதிகளில் பாரிய வெள்ள நிலைமை ஏற்பட்டுள்ளது.
களனி கங்கையின் பெருவெள்ளப் பாதிப்பின் காரணமாக இலங்கைப் பாராளுமன்றமும், வெள்ளத்தில் மூழ்கியுள்ளது. இதேவேளை லக்ஷபான, காசல்ரே நீர்த்தேதங்களில் அதிகளவு நீர் சேர்ந்தமையால், அவற்றின் வான் கதவுகள் திறக்கப்பட்டுள்ளன. இதனால் களனி கங்கையை சூழவுள்ள தற்போதைய வெள்ள நிலமை மேலும் மோசமடையலாம். ஆகவே அப்பகுதி மக்கள் பாதுகாப்பான பிரதேசங்களுக்குப் போகும்படி அறிவுறுத்தப்பட்டிருக்கிறார்கள்.
இருபதினாயிரத்துக்கும் அதிகமான இராணுவத்தினர், பல்வேறு குழுக்களாகப் பாதிப்புற்ற பிரதேசங்களில், இலங்கைக் கடற்படை, மற்றும் விமானப்படையுடன் இணைந்து மீட்புப் பணிகளில் ஈடுபட்டு வருவவதாகவும், போக்குவரத்துத் தடைப்பட்ட பிரதேசங்களில் ஆபத்தான பகுதிகளில் உள்ளவர்கள் விமானப் படையினரின் ஹெலிகாப்டர்கள் உதவியுடன் மீட்கப்படுவதாகவும் தெரிவிக்கப்பட்டுள்ளது.
உதவிப்பொருட்களுடன் கொழும்புத் துறைமுகத்துக்கு வந்த இந்திய விமானந்தாங்கிக் கப்பலில் தரித்துள்ள ஹெலிகொப்டர்களின் உதவியும் கோரப்பட்டுள்ளதாகவும், பலமான காற்று வீச்சினால், வழி மீட்பிலும் பலத்த சிரமங்கள் காணப்படுவதாகவும் தெரிவிக்கப்படுகிறது.
