மனித சமூகத்தில் தகவல் பரிமாற்றம் முன்னேற்றத்தின் முதுகெலும்பாக விளங்குகிறது. செய்தித்தாள்கள், வானொலி, தொலைக்காட்சி போன்ற பிரதான ஊடகங்கள் நீண்ட காலமாக மக்களின் தகவல் தேவையை பூர்த்தி செய்தன. ஆனால், டிஜிட்டல் தொழில்நுட்ப வளர்ச்சியால் தகவல் உலகம் வேகமாக மாறிவிட்டது.
மக்கள் மத்தியில் பிரதான ஊடகங்களின் மீதான நம்பிக்கை இழப்பு, சமூக வலைத்தளங்களின் பரவல் அதிகரித்துள்ளன. இந்நிலையில் நேர்மையான சுதந்திர ஊடகச் செயற்பாடுகளின் தேவை குறித்து சற்று விரிவாகப் பார்க்கலாம்.
இன்று, பிரதான ஊடகங்களின் மீதான மக்கள் நம்பிக்கை குறைந்துள்ளது.சமூக வலைத்தளங்கள் தகவல் பரிமாற்றத்தில் ஆதிக்கம் செலுத்துகின்றன. இதன் மத்தியில், உண்மைச் செய்தியையும் சமூகப் பொறுப்பையும் தக்க வைத்துக்கொள்ள போராடும் சுதந்திர ஊடகச் செயற்பாடுகள் முக்கிய இடத்தைப் பெற்றுள்ளன. பிரதான ஊடகங்கள், சமூக வலைத்தளங்கள், சுதந்திர ஊடகங்கள் என இம்மூன்று கூறுகளையும் , ஒப்பிட்டு ஆராய்வது அவசியமாகிறது.
பிரதான ஊடகங்களின் பாரம்பரிய பங்கு
பிரதான ஊடகங்கள் ஜனநாயகத்தின் ‘நான்காவது தூண்’ என அழைக்கப்படுகின்றன. அவை; உண்மைத் தகவல் வழங்குதல், ஆட்சியை கண்காணித்தல், மக்களின் குரலை வெளிப்படுத்துதல், சமூக விழிப்புணர்வு ஏற்படுத்துதல், போன்ற கடமைகளை வகித்தன. ஆனால் காலப்போக்கில் அவற்றின் செயல்பாடுகள் மாற்றமடைந்தன. இதனால் இத்தைய ஊடகங்கள் மீது மக்கள் நம்பிக்கை குறைந்து வருகிறது.
நம்பிக்கை இழப்பிற்கான காரணங்கள்
1. அரசியல் சார்பு ( சில ஊடகங்கள் குறிப்பிட்ட அரசியல் அல்லது அதிகார அமைப்புகளுக்கு ஆதரவாக செயல்படுகின்றன.)
2. வணிகமயமாக்கல் ( TRP, விளம்பர வருவாய், லாப நோக்கம் ஆகியவை செய்திகளின் தரத்தை பாதிக்கின்றன).
3. உணர்ச்சி தூண்டும் செய்தியறிக்கை ( ‘Breaking News’, ‘Debate Shows’ போன்றவை உண்மையை விட பரபரப்பை அதிகரிக்கின்றன)
4. வெளிப்படைத்தன்மை குறைவு
செய்தியின் பின்னணியை மக்களுக்கு தெளிவாகச் சொல்லாத நிலை நம்பகத்தன்மையை இழக்கச் செய்கிறது. இதனால் மக்கள் மாற்று தகவல் மூலங்களை நாட ஆரம்பித்தனர்.
சமூக வலைத்தளங்களின் எழுச்சி
சமூக வலைத்தளங்கள் தகவல் ஜனநாயகத்தை உருவாக்கின. இதனால் இப்போது யாரும் செய்தியை பகிரலாம், நேரடி காட்சிகள் வெளியிடலாம், அதிகாரத்தை கேள்வி கேட்கலாம், இதனால் குடிமக்கள் செய்தியாளர்களாக மாற்றமடைந்தனர். இதனால் உடனடி தகவல் பரிமாற்றம், பல்வேறு குரல்கள், சமூக இயக்கங்களுக்கு ஆதரவு, எதிர்மறை விளைவுகள், தவறான தகவல்கள், வதந்திகள், வெறுப்புரைகள் , உண்மைத் தகவல் குழப்பம், என்பன நேர்மறை விளைவுகள் ஆயின. அதனால் சமூக வலைத்தளங்களும் முழுமையான தீர்வாக அமையவில்லை.
சுதந்திர ஊடகச் செயற்பாடுகள் ஒரு மாற்று குரல்
இந்த இரு சூழல்களுக்கும் இடையில், சுதந்திர அல்லது மாற்று ஊடகங்கள் (Independent/Alternative Media) உருவாகின. இவை பொதுவாக, நிறுவனங்களின் கட்டுப்பாடின்றி செயல்படுதல், சமூக நீதி, மனித உரிமை, சுற்றுச்சூழல், ஒடுக்கப்பட்ட மக்களின் குரல் போன்றவற்றை முன்னிறுத்துதல், ஆழமான ஆய்வு செய்தியறிக்கைகள் (investigative journalism) செய்தல், போன்ற பணிகளை மேற்கொள்கின்றன.
இவர்களின் செயல் உழைப்பு; தரவுகள் சேகரித்தல், தரை மட்ட ஆய்வு,அதிகாரத்தை நேரடியாகக் கேள்வி கேட்குதல், உண்மைச் சரிபார்ப்பு, மக்கள் மைய செய்தியறிக்கை, பெரிய வளங்கள் இல்லாமலேயே உண்மையை வெளிக்கொணர முயற்சிப்பது இவர்களின் சிறப்பு.ஆனால் இவர்களின் பயணம் எளிதானதல்ல.
சுதந்திர ஊடகங்கள் எதிர்கொள்ளும் சவால்கள்
பொருளாதார சிக்கல்கள்
விளம்பர ஆதரவு இல்லாததால் நிதி பற்றாக்குறை.
அரசியல் அழுத்தங்கள்
அச்சுறுத்தல், வழக்குகள், தடை நடவடிக்கைகள்.
பாதுகாப்பு பிரச்சனைகள் ( சில சமயங்களில் செய்தியாளர்கள் உயிர் ஆபத்தையும் எதிர்கொள்கிறார்கள்)
அணுகல் சிரமம்
பெரிய ஊடகங்களைப் போல மக்கள் அடைவது கடினம்.
சமூக வலைத்தள அல்காரிதம் - சிறிய ஊடகங்களின் செய்தி பரவாமல் தடைகள் ஏற்படுகின்றன. இதனால் உண்மைச் செய்தியைக் கொண்டு வர போராடும் நிலை உருவாகிறது.
ஒரு ஆரோக்கியமான தகவல் சூழல் உருவாக; ஊடக ஒழுக்கம் வலுப்படுத்த வேண்டும். மக்கள் ஊடக கல்வி பெற வேண்டும். சுதந்திர ஊடகங்களுக்கு ஆதரவு அளிக்க வேண்டும். உண்மைச் சரிபார்ப்பு அமைப்புகள் வளர வேண்டும். சமூக வலைத்தளங்கள் பொறுப்புடன் செயல்பட வேண்டும். மேற்குறித்த மூன்று வகையான ஊடகப் பரப்பும், இணைந்தால் தான் தகவல் ஜனநாயகம் சாத்தியம்.
பிரதான ஊடகங்களின் மீதான நம்பிக்கை இழப்பு ஒரு எச்சரிக்கை மணி. சமூக வலைத்தளங்கள் ஒரு வாய்ப்பு. சுதந்திர ஊடகங்கள் ஒரு நம்பிக்கை. உண்மை, நேர்மை, சமூகப் பொறுப்பு ஆகியவற்றை முன்னிறுத்தும் ஊடகப் பண்பாட்டை வளர்த்தால் மட்டுமே ஜனநாயகம் வலுவாகும். எனவே, தகவலைப் பெறும் மக்களும் விழிப்புணர்வுடன் செயல்பட வேண்டும்; ஊடகங்களும் பொறுப்புடன் செயல்பட வேண்டும்.
- 4தமிழ்மீடியாவிற்காக : மலைநாடான்
