வியாழக்கிழமை வடகிழக்கு கென்யாவின் மண்டேரா நகரில் உள்ள குடியிருப்பு ஒன்றில் சோமாலியாவைச் சேர்ந்த இஸ்லாமிய போராளிக் குழுவான அல் ஷபாப் தொடுத்த தாக்குதலில் 6 கிறித்தவர்கள் கொல்லப் பட்டுள்ளதாக அவர்களின் டெலிகிராம் கணக்கில் தெரிவிக்கப் பட்டுள்ளது. பூர்வீக சோமாலிய முஸ்லிம்கள் பெரும்பான்மையாக வசிக்கும் கென்யாவின் இப்பகுதியில் நன்கு திட்டமிடப் பட்டே அல் ஷபாப் இத்தாக்குதலைத் தொடுத்ததாகவும் வியாழக்கிழமை காலை இச்சம்பவம் நடைபெற்றதாகவும் தெரிய வருகின்றது.

தென்கிழக்கு அமெரிக்காவின் பல பகுதிகளை முக்கியமாக புளோரிடா மாநிலத்தை நாளை காலை தீவிரம் அடைந்து வரும் மேத்யூ ஹரிக்கேன் புயல் மிக வலிமையாகத் தாக்கவுள்ளதாகவும் இதனால் இப்பகுதிகளில் வசிக்கும் சுமார் 15 இலட்சம்  மக்களை உடனடியாக வெளியேறும் படி புளோரிடா கவர்னர் உத்தரவிட்டுள்ளதாகவும் செய்திகள் வெளியாகி உள்ளன.

அண்டை நாடான சீனா பாகிஸ்தானுக்கு ஆதரவு அளிக்கும் வகையில் பிரம்ம புத்திராவின் கிளை நதியை தடுத்துள்ளது என்று தகவல்கள் வெளியாகி உள்ளன. 

ஐ.நா பாதுகாப்பு சபை மிக விரைவாக எடுத்த ஒரு முடிவின் பிரகாரம் முன்னால் போர்த்துக்கல் பிரதமர் அந்தோனியோ குட்டெர்ரெஸ் 2017 தொடக்கம் முதல் பான் கீ மூனுக்குப் பதிலாக புதிய பொதுச் செயலாளராகப் பணியாற்றுவார் என அறிவிக்கப் பட்டுள்ளது. பாதுகாப்பு சபையைச் சேர்ந்த 15 தூதுவர்களும் சுமார் ஒரு தசாப்த காலமாக ஐ.நா இன் அகதிகளுக்கான உயர் அதிகாரியாக கடமையாற்றிய அந்தோனியோவை ஏகமனதாக தேர்ந்தெடுத்துள்ளனர்.

பாகிஸ்தான் போரை விரும்பவில்லை, அமைதியையே விரும்புகிறது என்று, பாகிஸ்தான் பிரதமர் நவாஸ் ஷெரீப் கூறியுள்ளார். 

2016 ஆம் ஆண்டின் வேதியியலுக்கான நோபல் பரிசு நேனோ மூலக்கூறு இயந்திரங்களை (Nano molecuar machines) வடிவமைத்த  அல்லது  ஒருங்கிணைத்த 3 விஞ்ஞானிகளுக்கு பகிர்ந்து அளிக்கப் படவுள்ளதாக சுவீடனின் நோபல் கமிட்டி அறிவித்துள்ளது.

ஃபோர்ப்ஸ் பத்திரிகையின் 2016 ஆம் ஆண்டுக்கான அமெரிக்காவின் முதல் 400 செல்வந்தர்கள் பட்டியலில் மைக்ரோசாஃட் ஸ்தாபகரும் இயக்குனருமான பில்கேட்ஸ் தொடர்ந்து முதலிடம் வகிக்கின்றார்.

More Articles ...

Most Read