வினோதம்
Typography

நிகழ்காலத்தில் அதிகரித்து வரும் சனத்தொகை, புவி வெப்ப மயமாதல், தீவிரவாதம், யுத்தம், அகதிகள் பிரச்சினை போன்ற ஏராளமான பிரச்சினைகள் இருக்கும் போது பூமி எப்போது அழியும் என்பது குறித்த சிந்தனை எவருக்கும் தேவையாக இருக்காது.

ஆனால் இது நிச்சயமாக இன்னும் இவ்வளவு வருடங்களில் இப்படித்தான் நிகழும் என ஆதாரத்துடன் சொல்கின்றார்கள் விஞ்ஞானிகள். அதாவது இன்னும் 5 பில்லியன் வருடங்களில் எமது சூரியன் இப்போது இருக்கும் மஞ்சல் குள்ளன் (Yellow dwarf star) என்ற அந்தஸ்தில் இருந்து அதில் செயற்பட்டு வரும் அணுக்கரு செயற்பாடு தீவிரமடைந்து அழியும் கட்டத்தை நெருங்கும் போது 100 மடங்கு பெரிதாகி சிவப்பு இராட்சதன் (Red giant) நிலையை அடையுமாம்.

அதன் போது சூரியனின் எல்லைக்கு உள்ளே வரும் புதன் வெள்ளி போன்ற கிரகங்களை அது விழுங்கி விட அதன் வெப்பக் கதிர்களில் சிக்கி பூமி அழிவை சந்திக்கும் எனவும் அப்போது பூமியின் உயிர் வாழ்க்கை (இதற்குள் நாம் வேறு உலகங்களுக்குக் குடி பெயர்ந்திருந்தால் தப்பிப்போம்!) பூரணமாக ஒரு முடிவுக்கு வரும் எனவும் விஞ்ஞானிகள் ஆதாரத்துடன் தெரிவித்துள்ளனர். மேலும் இதற்கு 2 பில்லியன் வருடங்கள் கழித்து சூரியன் பூமியின் அளவே கொண்ட சிறிய வெள்ளைக் குள்ளனாக (White dwarf) மாறி பின்னர் பூரணமாக அழிவடையுமாம்.

பூமியில் இருந்து 208 ஒளியாண்டு தூரத்தில் உள்ள சூரியனைப் போன்ற ஆனால் அழிவின் விளிம்பில் உள்ள சிவப்பு இராட்சத நட்சத்திரம் ஒன்றை சுற்றி வரும் அழிந்து கொண்டிருக்கும் கிரகம் (Dying planet) ஒன்றை தாம் அவதானித்து இருப்பதாகவும் அந்த அவதானமே பூமியின் தலைவிதிக்கான ஆதாரம் என்றும் விஞ்ஞானிகள் தெரிவித்துள்ளனர். பூமியின் உயிர்வாழ்க்கை துவம்சம் செய்யப் பட்டாலும் கடினமான பாறைகளால் ஆன அதன் மையப் பகுதி அழியாது எஞ்சியிருக்குமா என்பது குறித்து இப்போது எதுவும் கூற முடியாது எனவும் விஞ்ஞானிகள் தெரிவித்துள்ளனர்.

Most Read