திரைப்படவிழாக்கள்
Typography

 

பிரபல அமெரிக்க படத் தொகுப்பாளரான Claire Artherton க்கு Vision Award Ticinomoda விருது வழங்கி கௌரவித்தது லொகார்னோ திரைப்பட விழாக் குழு. லொகார்னோ திரைப்பட விழாவின் உயரிய விருதுகளில் ஒன்றான இவ்விருது, திரைப்படத் துறையில் பின்புலத்திலிருந்து பணிபுரிபவர்கர்களை கௌரவிப்பதற்காக வழங்கப்படுவது.

நவீன சினிமாவின் தலைசிறந்த இயக்குனர்களில் ஒருவராக கருதப்படும் பெல்ஜிய நாட்டைச் சேர்ந்த சாண்டெல் அகெர்மென் (Chantal Akerman) இன் பல ஆவண, புனைவுத் திரைப்படங்களுக்கு படத் தொகுப்பாளராக பணிபுரிந்தவர் Claire Artherton.

Hyper Realisme வகை சினிமாக்களுக்கு பெயர் போன குஸ் வன் செண்ட், மைக்கெல் ஹனாகே, டாட் ஹேய்னெஸ் போன்ற இயக்குனர்களுக்கு முன்னோடியானவர் சாண்டெல் அகெர்மென். அவருடைய திரைப்படங்களை பார்த்து அதன்பால் ஈர்க்கப்பட்டு திரைப்படத்துறையில் நுழைந்தவர்கள் குறித்த இயக்குனர்கள்.

1986ம் ஆண்டு வெளிவந்த Letters Home திரைப்படம் முதல் 2013 இல் வெளிவந்த No Home Movie வரை முப்பது வருடஙக்ளுக்கு மேல் பெரும்பாலான சாண்டல் அகெர்மன் திரைப்படஙக்ளுக்கு படத் தொகுப்பாளராக பணிபுரிந்தவர் Claire Artherton.

சீனம் மற்றும் தாயோயிசத் தத்துவங்களில் பெரிதும் ஈர்க்கபப்ட்டவரான Claire Artherton «நான் வெற்றிடம் எனும் தத்துவ முறையில் பெரிதும் ஈர்க்கப்பட்டவள். நீ எதையும் விளங்கப்படுத்தத் தேவையில்லை. நீ எதையும் நடத்தி வைக்கப் போவதில்லை. நீ அவை தானாக நடப்பதற்கு இடமளிக்கப் போகிறாய். உன் வாழ்க்கையே  வெற்றிடம் எனும் இயங்கு நிலையுடன் இணைக்கப்பட்டுள்ளது என்பது தாயோயிச தத்துவம். நீ அந்த வெற்றிடத்தை உருவாக்கும் போது அந்த வெற்றிடத்தில், ஒன்று மற்றொன்றாய் மாறுகிறது. ஒன்றுடன் ஒன்று இணைக்கப்படுகிறது. நான் படத்தொகுப்பு செய்யும் போது இவற்றையே முன்மாதிரியாக கொள்கிறேன். ஒரு ஆவணத் திரைப்படமோ, புனைவுத் திரைப்படமோ, நிஜ யதார்த்தத்தை அப்படியே விளங்கப்படுத்த வேண்டும் என நான் நினைப்பவள் அல்ல. நான் என் படத்தொகுப்பில் வெற்றிடத்தை மாத்திரம் உருவாக்குகிறேன். அந்த வெற்றிட இடத்தில், பார்வையாளர்கள் படத்துடன் தங்கள் சுய முயற்சியில் இணைத்துக் கொள்கிறார்கள். திரைப்படத்தை உணர்கிறார்கள். அதை பெற்றுக் கொள்கிறார்கள். அதை தங்களுக்கு தங்களுக்கு ஏற்ற வகையில் அனுபவித்துக் கொள்கிறார்கள். என்னைப் பொருத்தவரை ஒரு திரைப்படம், ஒருவரின் சுயத்தை பற்றியும், உலகத்தைப் பற்றியும் எண்ணங்களையும், கேள்விகளையும் உருவாக்க வேண்டும்» என்கிறார்.

படத்தில் காண்பிக்கப்படாத காட்சிகளுடன், அல்லது படத்தில் இல்லாமையாக இருக்கும் காட்சிகளுடன் எப்படி படத்தொகுப்பு மேற்கொள்கிறீர்கள் என கேள்வி எழுப்பிய போது, «பண்டைக்கால சீனர்கள் இயற்கையை ஓவியமாக வடிக்கும் போது அதற்கு வண்ணம் தீட்ட மறுத்தார்கள். அவர்களை பொருத்தவரை இயற்கை என்பது, அழகானதும், புரிந்துகொள்ள கடினமானதும் ஆகும். அதை மீள் உருவாக்கவோ, இன்னுமொரு கலை வடிவில் அப்படியே மறு உருவாக்கம் செய்ய முயற்சிப்பதோ பயனற்றது. அதனால் அவர்கள் தங்களுக்கே உரித்தான மை தொழில்நுட்பத்தை கண்டுபிடித்தார்கள். வண்ணங்கள் இன்றி கறுப்பு வெள்ளையிலும், தடித்த தூரிகையிலும் ஓவியங்கள் தீட்டினார்கள். அவர்களை பொருத்தவை இந்த வழியில் தான் அவர்கள் இயற்கையின் அண்மைக்கு வருவதாக உணர்ந்தார்கள். காரணம் அவர்கள் உருவாக்கிய வெற்றிட இடத்தில் பார்வையாளன் தனது கற்பனையால் நிரப்பிக் கொள்கிறான். இன்றைய படத்தொகுப்பும் இப்படித்தான் இருக்கிறது. அதிக வண்ணங்கள். அளவுக்கு அதிகமாக நிரப்பிக் கொள்கிறோம். எமக்கு வெற்றிடம், இல்லாமை என்பவற்றின் மீது பயம் மாத்திரமே இருக்கிறது. எனக்கு அந்த பயம் இல்லை. அதனால் படத்தில் இல்லாமையாக இருக்கும் காட்சிகளுடன் என்னால் பணிபுரிய முடிகிறது» என்கிறார்.

- லொகார்னோவிலிருந்து 4தமிழ்மீடியா ஊடகவியலாளர்கள்

BLOG COMMENTS POWERED BY DISQUS

பகிர்வதற்கு

 

 

மின்னஞ்சலில் பதிவுகள்

மின்னஞ்சலில் பதிவுகள்